﻿
اللى بنى مصر كان فى الأصل حقـــاني
لا عمره كان سلفى ولا حتى إخــــواني
ولا جـــــده ليبرالى ولا أصله علماني
صاين حقوق الناس عارف حــدود ربه
وولاده من بعـــده على منهجـــه إتربوا
كان حتى طوب الأرض يشهد له ويحبه
لا لجاه ولا سلطان كان عمره شهـوانى

اللى بنى مصر كان ف الأصل واد مجـدع 
يفهم ف معنى الشرف لا يخون ولا يخدع
فنان يمــوت ف الغنـا وف الصـلا يخشع 
بإيديه رســــــــم سكته وخــــط دستـوره 
شال البلد ف عينيه .. خلـدها ف سطوره
لا اتغـــر واتكبر ولا علَّى يـوم ســورُه
ولناسه خَدُّه مداس وقلبه كــان مَخْــدَع

اللى بنى مصر كان عالـــــم وكان منشد
ف الحق زى السيف وعشانه كان يحشد 
طيب مع المظلــوم ومع اللى ظلمه يشــد 
فـــلاح يحـب الغيـط وف ورشته أسـطى
ولو ســـألته يقـول أهى ماشية وألاسطة
بينه وبين ربه ماكـــانش فيــــه واسطـة 














